Prezantohet projekti “Digjitimi i Bibliotekës Kombëtare të Shqipërisë”

0
4

Pavarësisht situatës pandemike, që kufizon shërbimin të librave tek përdoruesit, Biblioteka Kombëtare hapet për lexuesin në rrugë digjitale. Përmes një faqeje të re on line, BKSH ofron mbi 265 mijë faqe të digjituara. Ministrja e Kulturës, Znj. Elva Margariti, së bashku me drejtorin e BKSH, Z. Piro Misha prezantuan para mediave faqen e re on line dhe materialet e digjituara. E mbështetur nga qeveria shqiptare, falë bashkëpunimit me AKSHI-n, Biblioteka Kombëtare e Shqipërisë vjen në vitin jubilar të kremtimit të 100-vjetorit të krijimit të saj me një sistem të ri të integruar bibliotekar, realizuar për herë të parë në Shqipëri nga një kompani shqiptare.

loading...

Bazuar në standardet ndërkombëtare të ndërtimit të sistemeve bibliotekare, sistemi mundëson integrimin e BKSh-së në rrjetin global të informacionit profesional për sistemin kombëtar bibliotekar. Përdoruesve të grupmoshave të ndryshme, brenda apo jashtë vendit, u ofrohet tanimë një faqe e re, lehtësisht e përdorshme, me rubrika të reja, me fusha dhe funksionalitete të shtuara, e qasshme për cilindo, nga kudo e në çdo kohë.

Sugjerime
loading...

“Viti 2020 duhet të ishte një festë e madhe për Bibliotekën Kombëtare. Plot 100 vjet më parë u themelua ky institucion i rëndësishëm, që lindi bashkë me Tiranën kryeqytet. Por na u desh të përballeshim me një vit të pazakontë, që do të kufizonte raportin e institucioneve kulturore me publikun. Por ne nuk duhej ta humbisnim atë, ndaj edhe punuam fort për ta mbajtur, për të gjetur rrugë të tjera komunikimi, përmes platformave on line dhe formulave të tjera të bashkëpunimit. Nga ana tjetër këto muaj distancimi social na vlejtën që të fokusohemi në disa aspekte të punës sonë, që marrin edhe më shumë rëndësi në kushtet e reja. Për Bibliotekën Kombëtare kanë qenë muaj të një pune intensive dhe i jam mirënjohëse çdo punonjësi të këtij institucioni, që punoi fort që në këtë vit jubilar, BK të kishte një sistem të ri të integruar bibliotekar, realizuar për herë të parë në Shqipëri nga një kompani shqiptare, sipas të gjitha standardeve europiane”, tha Ministrja Margariti.

“Themelimi i Bibliotekës Kombëtare është një nga vendimet e para të Kongresit të Lushnjes. Në vitin 1922 mori emrin Bibliotekë Kombëtare dhe është rasti që të përkujtojmë të gjithë ata personalitete dhe punonjës që kanë punuar fort për të krijuar këtë pasuri, që e nisi me 3 mijë objekte dhe sot ka 1 milion e 300 mijë. Biblioteka Kombëtare është ruajtësi i kujtesës kombëtare, i vetmi institucion ku ruhet gjithçka e shkruar në shqip dhe është detyra e BKSH, që t’i ruajë ato. Ky 100 vjetor është një rast, jo vetëm për të parë pas, por për t’u përballur me sfidat e këtij institucioni”, u shpreh drejtori i BKSH, Piro Misha. Ai e quajti procesin e digjitalizimit një “revolucion”, i cili sapo ka nisur.

Në lidhje me digjitalizimin, Ministrja Margariti u shpreh se po punohet në shumë drejtime për digjitalizimin e trashëgimisë sonë kulturore, materiale dhe jo materiale. Tashmë është drejt përfundimit ngritja e Njësisë së Digjitalizimit të Trashëgimisë Kulturore, një investim prej 650 mijë dollarësh i Fondit Shqiptaro-Amerikan të Zhvillimit, që do të shtrihet edhe në Berat e Korçë. Ministrja Margariti gjeti rastin të shprehet edhe për projektin e godinës së re të Bibliotekës Kombëtare. Sipas saj, hartimi i projektit dhe ecja përpara me zbatimin e tij, është sfida më e madhe e Ministrisë së Kulturës. Në këtë drejtim po punohet së bashku me Bashkinë e Tiranës dhe sipas Ministres Margariti, deri në muajin tetor, ky projekt do të jetë konkretizuar.

Sistemi i ri on line

Përmes sistemit të ri online mbi 265 mijë faqe librash, revistash, dorëshkrimesh, antikuarësh vijnë për lexuesit/përdoruesit, studiuesit shqiptarë e të huaj, studentët e pedagogët, si materiale të digjituara të shfletueshme e me mundësinë e kërkimit në tekst, dhe jo vetëm, duke përbërë një vlerë të shtuar edhe për punën kërkimore – shkencore. Përmes Bibliotekës Digjitale e-Albanica, – një mundësi qasjeje gjithnjë e më madhe në trashëgiminë e shkruar kombëtare kulturore e më gjerë, përtej mureve të bibliotekës, – shfletohen:

  • 154 libra (1873- 1944);
  • 127 koleksione revistash retrospektive shqipe, kryesisht me karakter kulturor (1883-1944);
  • 123 antikuarë (1473-1800);
  • 178 dorëshkrime (1106-1945);
  • 78 harta (1560-1800).
loading...

Leave a Reply